Zerodha Mutual Fund: गुंतवणूक करायची आहे पण प्रक्रिया गुंतागुंतीची वाटते का? आता यावर सोपा उपाय येतोय. झेरोधा फंड हाऊसने ३० सप्टेंबर रोजी ONDC (ओपन नेटवर्क फॉर डिजिटल कॉमर्स) मध्ये प्रवेश जाहीर केला आहे. म्हणजे आता झेरोधाचे म्युच्युअल फंड देशभरातील वेगवेगळ्या ONDC-सक्षम ॲप्स वर थेट उपलब्ध होणार आहेत.
ONDC म्हणजे काय?
ONDC हा प्रकार अगदी साध्या भाषेत सांगायचा तर एक डिजिटल बाजारपेठ आहे. जसं तुम्ही UPI मुळे कोणत्याही बँकेतून, कोणत्याही ॲपवरून सहज पैसे ट्रान्सफर करता, तसंच ONDC मध्ये विविध ॲप्स आणि प्लॅटफॉर्म्सवर एकसारख्या पद्धतीने खरेदी-विक्री करता येते. म्हणजे खरेदी करण्यासाठी एकाच ई-कॉमर्स ॲपवर अवलंबून राहायची गरज नाही. आता यात म्युच्युअल फंडसुद्धा आलेत. म्हणजे तुम्हाला वेगवेगळ्या ॲप्सवरून सहज झेरोधाचे फंड शोधून त्यात गुंतवणूक करता येणार आहे.
झेरोधाची खास ओळख
झेरोधा फंड हाऊसने स्वतःला पॅसिव्ह-ओन्ली AMC म्हणून वेगळं ठरवलं आहे. म्हणजेच ते मुख्यतः इंडेक्स फंड्स, ETFs (एक्सचेंज-ट्रेडेड फंड्स) आणि फंड ऑफ फंड्स अशी उत्पादने देतं. सध्या कंपनी सुमारे ₹८,००० कोटींची मालमत्ता व्यवस्थापित करते.
CEO विशाल जैन यांनी हे पाऊल ‘UPI क्षण’ म्हटलंय. त्यांचा विश्वास आहे की जसं आधारने ओळख सोपी केली, UPI ने पैसे पाठवणे सहज केलं, तसंच ONDC गुंतवणूक सर्वांसाठी पारदर्शक आणि सुलभ बनवेल.
गुंतवणूक आता आणखी जवळ
ONDC मधून झेरोधाचे फंड मिळू लागल्यामुळे पहिल्यांदा गुंतवणूक करणारे असोत किंवा अनुभवी गुंतवणूकदार, दोघांनाही एक सोपा डिजिटल मार्ग मिळणार आहे. गुंतवणुकीची प्रोसेस क्लिष्ट न होता आता ती जवळपास नेहमीच्या ऑनलाइन खरेदीसारखी होईल.
यामुळे गुंतवणूकदारांची अडचणही कमी होईल आणि वित्तीय उत्पादने खरंच सर्वांसाठी उघडी आणि सहज उपलब्ध होतील. एकंदरीत, झेरोधाने उचललेलं हे पाऊल गुंतवणुकीचं जग आणखी सोप करण्याकडे मोठं पाऊल आहे.
वाचा | Mutual Fund AMC म्हणजे काय? गुंतवणूकदारांसाठी संपूर्ण मार्गदर्शक
